2009-04-07

ജനതാദള്‍ ഇടതുമുന്നണിയില്‍ തന്നെയെന്ന്‌ വീണ്ടും ഗൗഡ


ബൈജൂജോണ്‍

ന്യൂഡല്‍ഹി: ജനതാദള്‍ കേരളത്തില്‍ ഇടതുമുന്നണിയില്‍ തന്നെ തുടരുമെന്ന്‌ ദേശീയ അധ്യക്ഷന്‍ എച്ച്‌ ഡി ദേവഗൗഡ വ്യക്തമാക്കി. പാര്‍ട്ടിയുടെ തിരഞ്ഞെടുപ്പ്‌ പ്രകടനപത്രിക പുറത്തിറക്കി നടത്തിയ വാര്‍ത്താസമ്മേളനത്തിലാണ്‌ അദ്ദേഹം ഇക്കാര്യം ആവര്‍ത്തിച്ചത്‌. കേരളത്തിലെ പ്രശ്‌നങ്ങള്‍ ഉടന്‍ പരിഹരിക്കുമെന്ന്‌ വീരേന്ദ്രകുമാര്‍ ഉറപ്പുനല്‍കിയതായും ഗൗഡ പറഞ്ഞു.
ജനതാദള്‍ ഇപ്പോഴും ഇടതുമുന്നണിയില്‍ തന്നെയാണ്‌. അതുകൊണ്ടാണ്‌ രാജിവച്ച മന്ത്രി മുഖ്യമന്ത്രിക്കൊപ്പം തിരഞ്ഞെടുപ്പു പ്രചാരണം നടത്തുന്നത്‌. മണ്ഡല പുനര്‍നിര്‍ണയത്തിലാണ്‌ കോഴിക്കോട്‌ സീറ്റ്‌ ജനതാദളിന്‌ നഷ്ടപ്പെട്ടത്‌. വീരേന്ദ്രകുമാര്‍ പക്വതയുള്ള നേതാവാണ്‌. ഒരിക്കലും യു.ഡി.എഫിലേക്കു പോവുന്ന കാര്യം പറഞ്ഞിട്ടില്ല. പാര്‍ട്ടിയുടെ ഐക്യം നിലനിര്‍ത്തേണ്ട ബാധ്യത അദ്ദേഹത്തിനുണ്ട്‌. മന്ത്രിയല്ല, മുന്നണിയാണു പ്രധാനപ്പെട്ടത്‌. പ്രാദേശികമായ ചില പ്രശ്‌നങ്ങള്‍ കേരളത്തിലുണ്ട്‌ ഇതു പരിഹരിക്കാന്‍ സംസ്ഥാന അധ്യക്ഷനെ ചുമതലപ്പെടുത്തിയിട്ടുണ്ട്‌.
മൂന്നാംമുന്നണിയുടെ പ്രധാനമന്ത്രിസ്വപ്‌നവുമായി ദേവഗൗഡയുടെ നേതൃത്വത്തിലുള്ള ജനതാദള്‍ തിരഞ്ഞെടുപ്പു പ്രകടനപത്രിക പുറത്തിറക്കി. കാര്‍ഷിക കടങ്ങള്‍ മുഴുവന്‍ എഴുതിത്തള്ളും, 60 വയസ്സിനു മുകളില്‍ പ്രായമുള്ള കര്‍ഷകര്‍ക്കും തൊഴിലാളികള്‍ക്കും പ്രതിമാസം 500 രൂപ പെന്‍ഷന്‍, ഗ്രാമീണമേഖലകളിലെ സ്‌കൂള്‍ കുട്ടികള്‍ക്ക്‌ സംവരണം ഉറപ്പുവരുത്താന്‍ ഭരണഘടനാ ഭേദഗതി തുടങ്ങി നിരവധി പ്രഖ്യാപനങ്ങളാണു പ്രകടനപത്രികയിലുള്ളത്‌. താന്‍ കര്‍ണാടകയില്‍ മുഖ്യമന്ത്രിയായിരുന്നപ്പോഴും പ്രധാനമന്ത്രിയായിരുന്നപ്പോഴും നടപ്പാക്കിയ പല പദ്ധതികളും മുഖ്യധാരാ പാര്‍ട്ടികള്‍ പ്രകടനപത്രികയില്‍ ഉള്‍പ്പെടുത്തിയത്‌ അഭിനന്ദനാര്‍ഹമാണെന്നു ഗൗഡ പറഞ്ഞു.

മതേതര സര്‍ക്കാര്‍ അധികാരത്തിലെത്തണം


റാഫി പട്ടര്‍പാലം
മുന്നണി ഏതായാലും മതേതര കാഴ്‌ചപ്പാടുള്ള സര്‍ക്കാര്‍ കേന്ദ്രത്തില്‍ അധികാരത്തില്‍വരണമെന്നു ബഹിരാകാശ ടൂറിസത്തിനു തിരഞ്ഞെടുക്കപ്പെട്ട ഇന്ത്യന്‍ സഞ്ചാരി സന്തോഷ്‌ ജോര്‍ജ്‌ കുളങ്ങര അഭിപ്രായപ്പെട്ടു. മതകേന്ദ്രീകൃത രാഷ്ട്രീയപ്പാര്‍ട്ടികള്‍ കൂടിവരുകയാണ്‌. മതസംഘടനകള്‍ രാഷ്‌ട്രീയപ്പാര്‍ട്ടികളുമായി വിലപേശുന്നു. മതവിശ്വാസങ്ങള്‍ വ്യക്തിപരമായിരിക്കണം. അതു രാഷ്ട്രീയത്തില്‍ കൂട്ടിക്കലര്‍ത്തരുത്‌.
മതേതരത്വമില്ലാത്തതാണ്‌ അയല്‍രാജ്യങ്ങളായ പാകിസ്‌താന്‍, ബംഗ്ലാദേശ്‌, നീപ്പാള്‍ എന്നിവിടങ്ങളില്‍ നാം കണ്ടുകൊണ്ടിരിക്കുന്നത്‌. സങ്കുചിത മത, ജാതീചിന്ത വെടിഞ്ഞാല്‍ ലോകത്തിലെ ഒന്നാംകിടയായി മാറാന്‍ നമുക്കു കഴിയും. നൂറുകോടി ജനങ്ങള്‍ അഞ്ചുവര്‍ഷം കൂടുമ്പോള്‍ ചിട്ടയും വിപുലവുമായി സമ്മദിദാനാവകാശം വിനിയോഗിക്കുന്ന നമ്മുടെ തിരഞ്ഞെടുപ്പു വലിയ സംഭവമാണ്‌. തിരഞ്ഞെടുപ്പു വിജയകരമെന്ന്‌ അത്യാധുനിക സൗകര്യങ്ങളുള്ള അമേരിക്ക അവകാശപ്പെടുമ്പോള്‍, കാളവണ്ടിയില്‍ ബാലറ്റുപെട്ടിയുമായി വൈദ്യുതിയും ഗതാഗത സൗകര്യങ്ങളുമില്ലാത്ത ഉള്‍ഗ്രാമങ്ങളിലെത്തി സോളാര്‍ബാറ്ററി ഉപയോഗിച്ചുള്ള വോട്ടിങ്‌യന്ത്രം കൊണ്ടു ജനാധിപത്യത്തില്‍ പങ്കാളികളാക്കുന്നുവെന്നത്‌ അദ്‌ഭുതമാണ്‌ 62 ഓളം രാജ്യങ്ങള്‍ സന്ദര്‍ശിച്ച അദ്ദേഹം പറഞ്ഞു.

കേരളത്തില്‍ കളം പിടിക്കാനുറച്ച്‌ ബി.ജെ.പി

കേരളത്തില്‍ അക്കൗണ്ട്‌ തുറക്കുമെന്ന പ്രഖ്യാപനം ഫലപ്രാപ്‌തിയിലെത്തിക്കാന്‍ ബി.ജെ.പിക്ക്‌ ഇതുവരെ കഴിഞ്ഞിട്ടില്ലെങ്കിലും അവരുടെ പ്രതീക്ഷയ്‌ക്കു തെല്ലും കോട്ടമില്ല. സംസ്ഥാനത്തു ശക്തമായ വോട്ട്‌ ഉണ്ടെങ്കിലും ഓരോ തിരഞ്ഞെടുപ്പിലും വോട്ട്‌വില്‍പ്പനയുടെ ആരോപണം ബി.ജെ.പിയെ തിരിഞ്ഞുകൊത്തുന്നു.
എന്നാല്‍, ഇത്തവണ പാര്‍ലമെന്റ്‌ തിരഞ്ഞെടുപ്പില്‍ പഴയ ആരോപണത്തിന്‌ ഇടകൊടുക്കില്ലെന്ന വിശ്വാസത്തിലാണു ബി.ജെ.പി കരുത്തന്മാരെ ഗോദയിലിറക്കിയത്‌. തിരുവനന്തപുരത്ത്‌ സംസ്ഥാന പ്രസിഡന്റ്‌ പി കെ കൃഷ്‌ണദാസും പാലക്കാട്ട്‌ മുന്‍ സംസ്ഥാന പ്രസിഡന്റ്‌ സി കെ പത്മനാഭനും കോഴിക്കോട്‌ പാര്‍ട്ടി സംസ്ഥാന വൈസ്‌ പ്രസിഡന്റ്‌ വി മുരളീധരനും കാസര്‍കോഡ്‌ യുവമോര്‍ച്ച പ്രസിഡന്റ്‌ കെ സുരേന്ദ്രനും ശക്തമായ പോരാട്ടമാണു കാഴ്‌ചവയ്‌ക്കുന്നത്‌.
തലസ്ഥാന മണ്ഡലത്തില്‍ അക്കൗണ്ട്‌ തുറക്കാമെന്ന പ്രതീക്ഷയിലാണു പി കെ കൃഷ്‌ണദാസ്‌. മണ്ഡലത്തിലെ സ്ഥാനാര്‍ഥിയാവുന്നതില്‍ നിന്നു ബി.ജെ.പി നേതാവും മുന്‍ കേന്ദ്രമന്ത്രിയുമായ ഒ രാജഗോപാല്‍ പിന്‍മാറിയതു യു.ഡി.എഫ്‌ സ്ഥാനാര്‍ഥി ശശി തരൂരിന്റെ സമ്മര്‍ദ്ദത്തിനു വഴങ്ങിയാണെന്ന ആരോപണം മണ്ഡലത്തിലെ ബി.ജെ.പി വോട്ടര്‍മാരില്‍ ചര്‍ച്ചാവിഷയമാണ്‌. വോട്ട്‌കച്ചവടം ഇത്തവണയും നടക്കുമെന്നതിന്റെ സുചനകളാണ്‌ ഒ രാജഗോപാലിന്റെ പിന്‍മാറ്റമെന്ന്‌ അവര്‍ പ്രചരിപ്പിക്കുന്നു. 2005ല്‍ സി കെ പത്മനാഭന്റെ അനുഭവം തനിക്കുണ്ടാവില്ലെന്നു കൃഷ്‌ണദാസ്‌ പ്രതീക്ഷിക്കുന്നു. സര്‍ക്കാരിന്റെ മുസ്‌ലിം പ്രീണനം, മഅ്‌ദനിയുടെ തീവ്രവാദം, പൊന്നാനിയിലെ മതേതര ആഭാസം, മലപ്പുറത്ത്‌ തുടങ്ങാന്‍പോവുന്ന അലിഗഡ്‌ ഓഫ്‌ കാംപസ്‌, മാറാട്ടെ നീതിനിഷേധം എന്നിവയാണ്‌ ഇവിടെ ബി.ജെ.പിയുടെ പ്രധാന പ്രചാരണായുധങ്ങള്‍.
കേരളത്തില്‍ നിന്നു മാറിമാറി മുന്നണികളെ വിജയിപ്പിച്ച ചരിത്രം ഇത്തവണ മാറ്റിക്കുറിക്കുമെന്നാണു കാസര്‍കോഡ്‌ കെ സുരേന്ദ്രന്റെ വിശ്വാസം. നേരത്തേ സ്ഥാനാര്‍ഥിപ്രഖ്യാപനം വന്നതിനാല്‍ ഒന്നര മാസക്കാലമായി മണ്ഡലത്തിന്റെ മുക്കിലും മൂലയിലും സുരേന്ദ്രന്‌ എത്താനായി. ജില്ലയിലെ ആറു പഞ്ചായത്തുകള്‍ ബി.ജെ.പിയുടെ പക്കലാണെന്നതു സുരേന്ദ്രന്റെ പ്രതീക്ഷ വര്‍ധിപ്പിക്കുന്നു. കാസര്‍കോഡ്‌,മഞ്ചേശ്വരം അസംബ്ലി മണ്ഡലങ്ങളില്‍ നിര്‍ണായക സ്വാധീനവും ബി.ജെ.പിക്കുണ്ട്‌. കഴിഞ്ഞ നിയമസഭാ തിരഞ്ഞെടുപ്പില്‍ ബി.ജെ.പി രണ്ടാം സ്ഥാനത്തായിരുന്നു. ഹിന്ദുത്വവികാരം ഉണര്‍ത്തിയാണു ബി.ജെ.പി പ്രചാരണം നടത്തുന്നത്‌. മദ്‌റസാ അധ്യാപകര്‍ക്കു പെന്‍ഷന്‍ നല്‍കുന്നതിനെതിരേയും സച്ചാര്‍ കമ്മീഷനെതിരേയും പാര്‍ട്ടി പ്രചാരണം നടത്തുന്നു. കര്‍ണാടകയിലെ ബി.ജെ.പി ഭരണവും അതിര്‍ത്തിമണ്ഡലത്തില്‍ സുരേന്ദ്രനു സഹായകമാവുന്നു.
നെല്ലറയുടെ നാട്ടില്‍ പ്രചാരണരംഗത്ത്‌ ഇടതു-വലതു മുന്നണികള്‍ ബഹുദൂരം മുന്നിലാണെങ്കിലും പാര്‍ട്ടിയുടെ സ്വാധീനം ഒരിക്കല്‍ക്കൂടി അരക്കിട്ടുറപ്പിക്കാനുള്ള അതീവശ്രമത്തിലാണു സി കെ പത്മനാഭന്‍. സ്ഥാനാര്‍ഥിയുടെ വ്യക്തിപ്രഭാവം വോട്ട്‌ വര്‍ധിപ്പിക്കുമെന്നാണു ബി.ജെ.പിയുടെ പ്രതീക്ഷ.
പ്രായം അറുപതിലെത്തിയെങ്കിലും സി കെ പിയുടെ പോരാട്ടവീര്യത്തിനു കുറവില്ല. അദ്ദേഹം നാലാംഘട്ട പര്യടനം പൂര്‍ത്തിയാക്കി. നെറികെട്ട കേന്ദ്രഭരണത്തിനെതിരേയും നിഷ്‌ക്രിയമായ സംസ്ഥാന ഭരണത്തിനെതിരേയുമുള്ള നിശ്ശബ്ദതരംഗം രൂപപ്പെട്ടിട്ടുണ്ടെന്നും ഇതു ബി.ജെ.പിക്കു സഹായകമാവുമെന്നും അദ്ദേഹം പറഞ്ഞു. ഇരുമുന്നണികളും ഉയര്‍ത്തിക്കാട്ടുന്ന മുദ്രാവാക്യങ്ങളും വാഗ്‌ദാനങ്ങളും സി കെ പി തിരിച്ചു പ്രയോഗിക്കുന്നു. കാര്‍ഷികരംഗത്തിന്റെ ഉയിര്‍ത്തെഴുന്നേല്‍പ്പിനു സഹായകമായ പദ്ധതികള്‍ നടപ്പാക്കുമെന്നു വോട്ടര്‍മാര്‍ക്ക്‌ ഉറപ്പുനല്‍കുന്നു. കൂടാതെ, ദേശീയ-ഗ്രാമീണ പാതകളുടെ വികസനം സാധ്യമാക്കുമെന്ന വാഗ്‌ദാനവും. എവിടെയും മുന്നണിയില്ലാതെ ഒറ്റയ്‌ക്കു മല്‍സരിക്കാന്‍ ബി.ജെ.പിക്കല്ലാതെ മറ്റാര്‍ക്കുമാവില്ലെന്നു സി കെ പി വെല്ലുവിളിക്കുന്നു. പാലക്കാട്‌ നഗരം, ഒറ്റപ്പാലം തുടങ്ങിയ മേഖലകളില്‍ ബി.ജെ.പിക്കു ശക്തമായ സ്വാധീനമുണ്ട്‌. കഴിഞ്ഞ തിരഞ്ഞെടുപ്പില്‍ 1,47,792 വോട്ടാണ്‌ ബി.ജെ.പി നേടിയത്‌.
കോഴിക്കോട്ടും പ്രചാരണത്തില്‍ ബി.ജെ.പി ഏറെ മുന്നിലാണ്‌. ബി.ജെ.പി വിട്ട ജനപക്ഷം തലവേദന ഉയര്‍ത്തുന്നുണ്ടെങ്കിലും കഴിഞ്ഞതവണ ലഭിച്ച 98,000 വോട്ടില്‍ നിന്നു കുതിച്ചുചാടുമെന്ന കാര്യത്തില്‍ നേതൃത്വത്തിനു സംശയമില്ല. കോഴിക്കോടിനു നഷ്ടപ്പെട്ട വ്യാപാരപൈതൃകം വീണ്ടെടുക്കുമെന്നാണു മുരളീധരന്റെ പ്രധാനപ്പെട്ട വാഗ്‌ദാനം. ആരോഗ്യ-വിദ്യാഭ്യാസരംഗത്തെ വികസനം, കാര്‍ഷിക-വ്യാവസായിക പുരോഗതി എന്നിവയും മുരളീധരന്‍ വോട്ടര്‍മാര്‍ക്ക്‌ ഉറപ്പു നല്‍കുന്നു. മണ്ഡലപുനര്‍നിര്‍ണയത്തിലൂടെ പുതുതായി വന്ന കുന്ദമംഗലത്തും മാറാട്‌ ഉള്‍പ്പെടുന്ന ബേപ്പൂരിലും പാര്‍ട്ടിയുടെ സംഘടനാശേഷി കൂടുതലുണ്ടെന്നു മുരളീധരന്‍ പറയുന്നു. കോണ്‍ഗ്രസ്സും സി.പി.എമ്മും പരസ്‌പരം മല്‍സരിച്ചു തിരഞ്ഞെടുപ്പിനു ശേഷം ഒരുമിക്കുന്നതു തിരിച്ചറിയുന്ന ജനം തനിക്കു വോട്ട്‌ ചെയ്യുമെന്നു മുരളീധരന്‍ പറയുന്നു.

റിപോര്‍ട്ട്‌: വി കെ എ സുധീര്‍, അബ്ദുര്‍റഹ്‌മാന്‍ ആലൂര്‍,
സമദ്‌ പാമ്പുരുത്തി,
എം മുഹമ്മദ്‌ ഷഹീദ്‌

തമിഴ്‌ സംഘടനകള്‍ ഇടുക്കിയിലെ വോട്ടുകള്‍ ഏകോപിപ്പിക്കുന്നു

ഷബ്‌ന സിയാദ്‌

ഇടുക്കി: രണ്ടര ലക്ഷത്തിലേറെ വരുന്ന തമിഴ്‌വോട്ടുകള്‍ ഏകോപിപ്പിക്കാന്‍ ഇടുക്കി മണ്ഡലത്തിലെ തമിഴ്‌സംഘടനകള്‍ ശ്രമിക്കുന്നു. ഇതിന്റെ ഭാഗമായി വിടുതലൈ ചിരുതൈകള്‍ കക്ഷി എന്ന തമിഴ്‌സംഘടന ഇടുക്കിയില്‍ മത്സരരംഗത്തുണ്ട്‌. ഇവിടെ തമിഴ്‌വോട്ടുകളുടെ ധ്രുവീകരണത്തിന്‌ അടിത്തറയിടാമെന്നതാണ്‌ ഇവരുടെ പ്രതീക്ഷ.
വിടുതലൈ ചിരുതൈകള്‍ സ്ഥാനാര്‍ഥിയായ ആര്‍ വാസുദേവന്‍ തമിഴ്‌ സ്വാധീന അസംബ്ലി മണ്ഡലങ്ങളായ ദേവികുളം, പീരുമേട്‌, ഉടുമ്പന്‍ചോല എന്നിവിടങ്ങളില്‍ പ്രചാരണം നടത്തിവരുന്നു.
തമിഴ്‌വംശജരുടെ ഏകോപനം ശക്തമായതു 2008 മാര്‍ച്ചിലുണ്ടായ മൂന്നാര്‍ പാര്‍വതിമല കൈയേറ്റത്തോടെയാണ്‌. മൂന്നാര്‍ ദൗത്യസംഘം 2007 മെയില്‍ ഒഴിപ്പിച്ച പാര്‍വതിമലയിലെ 44.7 ഏക്കര്‍ ഭൂമി കഴിഞ്ഞ മാര്‍ച്ച്‌ 24ന്‌ തമിഴ്‌വംശജര്‍ കൈയേറിയിരുന്നു. എ.ഐ.എ.ഡി.എം.കെ ജില്ലാ പ്രസിഡന്റ്‌ ചൂട്ടുസ്വാമിയുടെ നേതൃത്വത്തിലായിരുന്നു കൈയേറ്റം. എസ്റ്റേറ്റില്‍ നിന്നു വിരമിക്കുന്ന തമിഴ്‌ തൊഴിലാളികള്‍ക്കു കിടപ്പാടമില്ലെന്ന വികാരപരമായ പ്രശ്‌നമുയര്‍ത്തിയായിരുന്നു കൈയേറ്റം. ഭൂമി കൊടുക്കാമെന്ന ഉറപ്പി?ലാണ്‌ അവര്‍ പിന്‍മാറിയത്‌.
വിടുതലൈ ചിരുതൈകള്‍ കക്ഷിയും ഇതോടെയാണു മൂന്നാറില്‍ ഇടംപിടിച്ചത്‌. ഇത്തരത്തിലുള്ള തമിഴ്‌ ഏകീകരണം ഭാവിയില്‍ ഗുരുതര പ്രത്യാഘാതമുണ്ടാക്കുമെന്നു കേന്ദ്ര സ്‌പെഷ്യല്‍ ബ്രാഞ്ച്‌ സര്‍ക്കാരിന്‌ റിപോര്‍ട്ട്‌ നല്‍കിയിട്ടുണ്ട്‌.
ഇടുക്കി ജില്ലയില്‍ 7,69,605 വോട്ടര്‍മാരാണ്‌ ആകെയുള്ളത്‌. ഇതില്‍ തമിഴ്‌വംശജര്‍ക്ക്‌ സ്വാധീനമുള്ള പീരുമേട്‌, ഉടുമ്പന്‍ചോല, ദേവികുളം മണ്ഡലങ്ങളിലായി രണ്ടു ലക്ഷത്തിലേറെ വോട്ടുകള്‍ തമിഴ്‌വംശജരുടേതാണ്‌. മൂന്നാര്‍ ഗ്രാമപ്പഞ്ചായത്തില്‍ 21 പഞ്ചായത്തംഗങ്ങളില്‍ എല്ലാവരും തമിഴ്‌വംശജരാണ്‌. പീരുമേട്‌ അസംബ്ലി മണ്ഡലത്തിലെ വണ്ടിപ്പെരിയാര്‍ പഞ്ചായത്തിലെ 22 അംഗങ്ങളില്‍ 16 പേര്‍ തമിഴരാണ്‌. 1,37,037 തമിഴ്‌വോട്ടുകളുള്ള ദേവികുളം അസംബ്ലി മണ്ഡലത്തില്‍ തമിഴ്‌വംശജരല്ലാതെ ആരും നിയമസഭാ സാമാജികരായിട്ടില്ല.
ഉടുമ്പന്‍ചോല അസംബ്ലി മണ്ഡലത്തിലെ ശാന്തംപാറ പഞ്ചായത്തില്‍ 80 ശതമാനം തമിഴരാണ്‌. കൂടാതെ ഉടുമ്പന്‍ചോല പഞ്ചായത്തില്‍ 35 ശതമാനം തമിഴരുണ്ട്‌. സേനാപതി ഖജനാപാറയിലെ മൂന്നും സേനാപതിയിലെ രണ്ടും വാര്‍ഡുകളില്‍ 90 ശതമാനത്തിലേറെ തമിഴരാണ്‌. ദേവികുളം താലൂക്കിലെ തമിഴരില്‍ ഏറെയും പള്ളര്‍, പറയര്‍ വിഭാഗത്തിലുള്ളവരാണ്‌. ഇരു മുന്നണി സ്ഥാനാര്‍ഥികളും തമിഴ്‌വോട്ടര്‍മാരെ സ്വാധീനിക്കാന്‍ തമിഴിലാണു പ്രചാരണം.

തിരുവനന്തപുരത്ത്‌ സമുദായവോട്ടുകള്‍ വിധി നിര്‍ണയിക്കും

ഡി ആര്‍ സരിത്ത്‌


തിരുവനന്തപുരം: പ്രചാരണപ്രവര്‍ത്തനങ്ങള്‍ അവസാനഘട്ടത്തിലെത്തി നില്‍ക്കുമ്പോള്‍ തലസ്ഥാനമണ്ഡലത്തില്‍ സാമുദായികവോട്ടുകളുടെ വിഘടനം തങ്ങള്‍ക്ക്‌ അനുകൂലമാവുമോയെന്നാണ്‌ ഇരുമുന്നണികളും ഉറ്റുനോക്കുന്നത്‌. നായര്‍, നാടാര്‍ സമുദായങ്ങള്‍ക്കു നിര്‍ണായകസ്വാധീനമുള്ള മണ്ഡലത്തില്‍ നായര്‍വോട്ടുകള്‍ ഇരുമുന്നണികള്‍ക്കും ബി.ജെ.പിക്കുമായി വിഭജിച്ചുപോവാനാണു സാധ്യത.
നാടാര്‍വോട്ടുകളില്‍ ഒരുവിഭാഗം ബി.എസ്‌.പി സ്ഥാനാര്‍ഥി നീലലോഹിതദാസന്‍ നാടാര്‍ക്കു ലഭിക്കുമെന്നുമുറപ്പാണ്‌. ഇടതുമുന്നണിയുടെയും യു.ഡി.എഫിന്റെയും വോട്ടുകള്‍ നീലന്റെ പെട്ടിയില്‍ വീഴും. കൂടുതലും ഇടതുമുന്നണിയുടെ വോട്ടുകളാവും നീലന്‍ പിടിക്കുക. ഇരുമുന്നണികളും നാടാര്‍ സ്ഥാനാര്‍ഥികളെ പരിഗണിക്കാത്തതില്‍ നാടാര്‍ സമുദായസംഘടനകള്‍ക്കുളള പ്രതിഷേധവും വോട്ടാക്കിമാറ്റാന്‍ നീലന്‍ ശ്രമിക്കും.
മണ്ഡലത്തിലെ അപരിചിതത്വമാണു ശശി തരൂരിനെ കുഴക്കുന്നത്‌. ആഗോളവ്യക്തിത്വം നഗരപ്രദേശങ്ങളില്‍ ശശി തരൂരിനു മുതല്‍ക്കൂട്ടാവുമെങ്കിലും അപരിചിതത്വം ഗ്രാമപ്രദേശങ്ങളില്‍ തരൂരിനു പ്രശ്‌നങ്ങള്‍ സൃഷ്ടിക്കും. എന്‍.സി.പി സ്ഥാനാര്‍ഥി എം പി ഗംഗാധരന്‍ രംഗത്തുളളതും ഇസ്രായേല്‍ അനുകൂലനിലപാടിന്റെ പേരില്‍ മുസ്‌ലിംസംഘടനകളില്‍ നിന്നുണ്ടാവുന്ന എതിര്‍പ്പും തരൂരിന്റെ വിജയപ്രതീക്ഷകളെ ബാധിക്കാനാണു സാധ്യത. നഗരത്തിലെ വോട്ട്‌കൊണ്ടു മാത്രം ജയിക്കാന്‍ തരൂരിനാവില്ല. നാടാര്‍വിഭാഗത്തിന്‌ ഏറെ സ്വാധീനമുള്ള നേമം, പാറശ്ശാല, കോവളം, നെയ്യാറ്റിന്‍കര മണ്ഡലങ്ങളില്‍ നേട്ടമുണ്ടാക്കാനായില്ലെങ്കില്‍ തലസ്ഥാനം തരൂരിനു ബാലികേറാമലയാവും.
എന്നാല്‍, ഗ്രാമപ്രദേശങ്ങളില്‍ നിന്നും നല്ല പിന്തുണയാണു ലഭിക്കുന്നതെന്ന ആത്മവിശ്വാസമാണു തരൂരിന്റെ തിരഞ്ഞെടുപ്പു കമ്മിറ്റി കണ്‍വീനര്‍ തമ്പാനൂര്‍ രവിക്ക്‌. ഗ്രാമപ്രദേശങ്ങളില്‍ തരൂരിന്റെ അപരിചിതത്വം പ്രശ്‌നങ്ങള്‍ സൃഷ്ടിക്കുന്നില്ലെന്ന്‌ അദ്ദേഹം തേജസിനോടു പറഞ്ഞു. നെയ്യാറ്റിന്‍കര, പാറശ്ശാല നിയമസഭാ മണ്ഡലങ്ങളില്‍ പര്യടനം നടത്തിയപ്പോള്‍ നല്ല പ്രതികരണമാണു ലഭിച്ചത്‌. എന്‍.സി.പി സ്ഥാനാര്‍ഥിയുടെ സാന്നിധ്യം തങ്ങളെ ബാധിക്കില്ല. നീലന്‍ പിടിക്കുന്ന വോട്ടുകള്‍ ഇടതുമുന്നണിയുടേതായിരിക്കുമെന്നും തമ്പാനൂര്‍ രവി പറഞ്ഞു.
മുസ്‌ലിം, ലാറ്റിന്‍, ഈഴവ വിഭാഗങ്ങള്‍ക്കും മണ്ഡലത്തില്‍ സ്വാധീനമുണ്ട്‌. പി.ഡി.പി പിന്തുണ ഇടതുപക്ഷത്തിനായതും പോപുലര്‍ ഫ്രണ്ട്‌ ശശി തരൂരിനെ പരാജയപ്പെടുത്തുമെന്നു പ്രഖ്യാപിച്ചതും തരൂരിന്റെ ഇസ്രായേല്‍ അനുകൂല പ്രതിഛായയും കാരണം മുസ്‌ലിംവോട്ടുകള്‍ യു.ഡി.എഫിനു ലഭിക്കാനുള്ള സാധ്യത ഇല്ലാതാക്കിയിട്ടുണ്ട്‌. നഗരപ്രദേശങ്ങളിലെ നിഷ്‌പക്ഷ മധ്യവര്‍ഗ വോട്ടുകളിലാണു തരൂരിന്റെ പ്രതീക്ഷ. ബി.ജെ.പി കഴിഞ്ഞ ഉപതിരഞ്ഞെടുപ്പിലെ പോലെ വോട്ട്‌കച്ചവടത്തിനു തയ്യാറാവുമോയെന്നതും മുന്നണികളെ ആശങ്കപ്പെടുത്തുന്നു. എന്നാല്‍, സംസ്ഥാന പ്രസിഡന്റ്‌ മല്‍സരിക്കുന്നതിനാല്‍ വോട്ട്‌കച്ചവടമുണ്ടാവില്ലെന്നാണു പാര്‍ട്ടിനേതൃത്വത്തിന്റെ അവകാശവാദം. മണ്ഡലത്തില്‍ 50,000 വോട്ട്‌ തങ്ങള്‍ക്കുണ്ടെന്നാണ്‌ എന്‍.സി.പി അവകാശപ്പെടുന്നത്‌. കോണ്‍ഗ്രസ്സിന്റെ ജയസാധ്യത അട്ടിമറി?ക്കാനാവും എന്‍.സി.പി ശ്രമിക്കുക.
നാട്ടുകാരന്‍ എന്ന വിശേഷണമാണ്‌ ഇടതുമുന്നണി സ്ഥാനാര്‍ഥി പി രാമചന്ദ്രന്‍ നായരുടെ കൈമുതല്‍. തുടക്കത്തില്‍ മുന്നണിയിലെ പടലപ്പിണക്കങ്ങള്‍ ചില്ലറ അലോസരങ്ങളുണ്ടാക്കിയെങ്കിലും പ്രചാരണത്തില്‍ രാമചന്ദ്രന്‍ നായര്‍ മുന്നിലാണ്‌. നീലന്റെ സ്ഥാനാര്‍ഥിത്വം രാമചന്ദ്രന്‍ നായര്‍ക്കു വിനയാവുന്നുണ്ട്‌. ജനതാദള്‍ ഔദ്യോഗികനേതൃത്വം യു.ഡി.എഫിനു പിന്തുണ പ്രഖ്യാപിച്ചത്‌ ഇടതുമുന്നണിയെ ആശങ്കപ്പെടുത്തുന്നുണ്ട്‌. എന്നാല്‍, ജനതാദള്‍ പ്രവര്‍ത്തകരില്‍ ബഹുഭൂരിപക്ഷവും ജില്ലാ കണ്‍വീനറും ജില്ലയിലെ പ്രമുഖ ദള്‍ നേതാവുമായ വി ഗംഗാധരന്‍ നാടാരും ഇടതുമുന്നണിക്കൊപ്പമാണെന്നു രാമചന്ദ്രന്‍ നായരുടെ തിരഞ്ഞെടുപ്പു കമ്മിറ്റി ജനറല്‍ സെക്രട്ടറി ജി ആര്‍ അനില്‍ തേജസിനോടു പറഞ്ഞു.
പ്രചാരണത്തില്‍ തങ്ങള്‍ ഏറെ മുന്നിലാണെന്നും അദ്ദേഹം അവകാശപ്പെട്ടു. ഇടതുമുന്നണിയുടെ വോട്ടുകള്‍ കൊണ്ടു മാത്രം ജയിക്കാനാവുമെന്ന ആത്മവിശ്വാസമാണ്‌ അനിലിന്‌.

2009-04-06

സോണിയക്ക്‌ ഇറ്റലിയില്‍ വീട്‌; ഇന്ത്യയില്‍ ഒരു കാറു പോലുമില്ല
















റായ്‌ബരേലി: കോണ്‍ഗ്രസ്‌ അധ്യക്ഷ സോണിയാഗാന്ധി റായ്‌ബരേലി മണ്ഡലത്തില്‍ പത്രിക സമര്‍പ്പിച്ചു. നാമനിര്‍ദ്ദേശപത്രികയോടൊപ്പം സമര്‍പ്പിച്ച കണക്കുകളനുസരിച്ച്‌ സോണിയക്ക്‌ ഒരു കോടി 38 ലക്ഷം രൂപയുടെ ആസ്‌തിയാണുള്ളത്‌.
ബാങ്ക്‌ നിക്ഷേപമായി 28.61 ലക്ഷം രൂപയും കൈവശം 75000രൂപയുമാണുള്ളത്‌. കൂടാതെ വിവിധ മ്യൂച്ചല്‍ ഫണ്ടുകളിലായി 32 ലക്ഷം രൂപയുടെ നിക്ഷേപമുണ്ട്‌. എന്നാല്‍ ഇന്ന്‌ നിക്ഷേപത്തിന്റെ മതിപ്പുവില മാത്രം രണ്ടു കോടി രൂപയോളം വരും. പോസ്‌റ്റ്‌ ഓഫിസ്‌ നിക്ഷേപങ്ങളില്‍ 199000 രൂപയും പി.എഫ്‌ ഫണ്ടില്‍ 24.88 ലക്ഷം രൂപയുമുണ്ട്‌. രണ്ടര കിലോ തൂക്കം വരുന്ന 11 ലക്ഷത്തിന്റെ സ്വര്‍ണ ഉരുപ്പടികളാണ്‌ സോണിയക്കുള്ളത്‌. നല്‍കിയ രേഖകളനുസരിച്ച്‌ സോണിയക്ക്‌ നാട്ടില്‍ കാറോ മറ്റു വാഹനങ്ങളോ ഇല്ല. പക്ഷേ, ഇറ്റലിയില്‍ പരമ്പരാഗതമായി കിട്ടിയ ഒരു വീടുണ്ട്‌. ഇതിന്‌ ഏകദേശം 18 ലക്ഷത്തോളം രൂപ വരുമെന്ന്‌ രേഖകളില്‍ പറയുന്നു.

ചാലക്കുടിയില്‍ വികസനം പറഞ്ഞ്‌ ധനപാലന്‍; ജനകീയനായി ജോസഫ്‌



ബിജോ സില്‍വറി
തൃശൂര്‍: തിരഞ്ഞെടുപ്പുപ്രചാരണച്ചൂടില്‍ തിളച്ചുമറിയുകയാണു ചാലക്കുടി ലോക്‌സഭാ മണ്ഡലം. ഇഞ്ചോടിഞ്ചു പോരാട്ടത്തില്‍ മണ്ഡലം നിറഞ്ഞുള്ള പ്രചാരണത്തിലാണ്‌ യു.ഡി.എഫിന്റെ ധനപാലനും എല്‍.ഡി.എഫിന്റെ യു പി ജോസഫും.
കഴിഞ്ഞതവണ ഒരു ലക്ഷത്തിലധികം വോട്ടിനു ലോനപ്പന്‍ നമ്പാടന്‍ കരുണാകരപുത്രി പത്മജയെ തോല്‍പ്പിച്ച പഴയ മുകുന്ദപുരത്ത്‌ ഇത്തവണ പ്രവചനങ്ങള്‍ തീര്‍ത്തും അസാധ്യം.
ചാലക്കുടി മണ്ഡലത്തിലെ പുതുതായി രൂപംകൊണ്ട കയ്‌പമംഗലത്തെ പള്ളിപ്പാടിയില്‍ നിന്നാണു കഴിഞ്ഞദിവസം ഇടതു സ്ഥാനാര്‍ഥി യു പി ജോസഫ്‌ തന്റെ പര്യടനത്തിനു തുടക്കമിട്ടത്‌. തീരദേശഗ്രാമത്തില്‍ സ്ഥാനാര്‍ഥിയും സംഘവും എത്തുമ്പോള്‍ പുലരി പിറക്കുന്നതേ ഉള്ളൂ. തുറന്ന വാഹനത്തിലാണു ജോസഫ്‌. ആദ്യസ്വീകരണം അഞ്ചാംപരത്തിയിലെ ഹരിജന്‍ കോളനിയില്‍. കൈകൂപ്പിയും കൈത്തലം കവര്‍ന്നും നിറഞ്ഞ ചിരിയോടെ ജോസഫ്‌. ശ്രീനാരാണപുരത്തിനു ശേഷം ചരിത്രമുറങ്ങിക്കിടക്കുന്ന പഴയ തൃക്കണാമതിലകത്തേക്കായിരുന്നു യാത്ര. മതിലകം പുഴയോരത്തു സംഘടിപ്പിച്ച സ്വീകരണയോഗത്തില്‍ സ്‌ത്രീകളടക്കം നിരവധി പേര്‍ കാത്തിരിക്കുന്നു. പിന്നീടു തൃപ്പേക്കുളം ക്ഷേത്രപരിസരത്തേക്ക്‌. പഞ്ചായത്തിലെ ശക്തികേന്ദ്രത്തില്‍ ഊഷ്‌മളമായ സ്വീകരണം. പെരിഞ്ഞനം പഞ്ചായത്തില്‍ പൊന്മാനിക്കുടത്തെത്തുമ്പോള്‍ സമയം ഒമ്പതു മണി. ചെന്ത്രാപ്പിന്നിയില്‍ റവന്യൂ മന്ത്രി കെ പി രാജേന്ദ്രന്‍, വടക്കാഞ്ചേരി എം.എല്‍.എ എ സി മൊയ്‌തീന്‍ എന്നിവര്‍ സ്ഥാനാര്‍ഥിയെ കാത്തുനിന്നിരുന്നു. ചാമക്കാല, വഞ്ചിപ്പുര, അഴീക്കോട്‌, കാര, പടിഞ്ഞാറേ വെമ്പല്ലൂര്‍, കൂളിമുട്ടം, കയ്‌പമംഗലം എന്നിങ്ങനെ ഓരോ മേഖലയിലും ചെറിയ സ്വീകരണയോഗങ്ങള്‍. പര്യടനം എം.ഐ.ടി സ്‌കൂള്‍പരിസരത്തു സമാപിക്കുമ്പോള്‍ രാത്രി പത്തു മണി.
ചാലക്കുടിയുടെ സമഗ്രവികസനത്തിനു വോട്ട്‌ തേടിയാണു യു.ഡി.എഫ്‌ സ്ഥാനാര്‍ഥി കെ പി ധനപാലന്‍ അങ്കമാലിയില്‍ പര്യടനം നടത്തിയത്‌. ചെറിയ വ്യവസായ സ്ഥാപനങ്ങളില്‍ കയറി ജീവനക്കാരോടു വോട്ടഭ്യര്‍ഥിക്കാന്‍ ധനപാലന്‍ മറന്നില്ല. മുക്കന്നൂര്‍ റേഷന്‍കട കവലയില്‍ പര്യടനത്തിനു തുടക്കമിടുമ്പോള്‍ ധാരാളം പ്രവര്‍ത്തകരും എത്തിച്ചേര്‍ന്നിരുന്നു. എറണാകുളം ജില്ലയുടെ മുക്കുംമൂലയും പരിചയമുള്ള ധനപാലന്‍ ചാലക്കുടി മണ്ഡലത്തിന്റെ വികസനം ഏറെ കാലമായി മുടങ്ങിക്കിടക്കുകയാണെന്നു നാട്ടുകാരെ ഓര്‍മിപ്പിക്കുന്നു. നഗരത്തിലെ ഫ്‌ളൈ ഓവറുകള്‍ പോലും ഇതുവരെ പൂര്‍ത്തിയായിട്ടില്ല. പുതിയ വ്യവസായങ്ങള്‍ വരുന്നില്ല. പ്രതിക്കൂട്ടില്‍ സംസ്ഥാന സര്‍ക്കാരിന്റെ അനാസ്ഥയെന്നു വിശദീകരണം. വട്ടപ്പറമ്പ്‌, ഷാപ്പ്‌ കവല, മൂഴിക്കുളം, എളവൂര്‍ എന്നിവിടങ്ങളിലും സ്ഥാനാര്‍ഥിക്ക്‌ ആവേശകരമായ വരവേല്‍പ്പുകള്‍. ഇടയ്‌ക്കു ത്രിവര്‍ണ ഖദര്‍ മാലകളണിയിച്ചു പ്രവര്‍ത്തകര്‍ ആദരങ്ങളറിയിക്കുന്നു.
കറുകുറ്റി പഞ്ചായത്തില്‍ പാലിശേരി, മുന്നൂര്‍പിള്ളി, പാലക്കല്‍, കരയാമ്പറമ്പ്‌ കവല, കോക്കുന്ന്‌, പൂതംകുറ്റി തുടങ്ങി കൊച്ചു കൊച്ചു സ്ഥലങ്ങളില്‍ പോലും സ്വീകരണങ്ങള്‍. ഇടയ്‌ക്കു പ്രാദേശിക നേതാക്കളുമായി തിരഞ്ഞെടുപ്പുപ്രവര്‍ത്തനങ്ങള്‍ വിലയിരുത്തല്‍. പാറക്കടവിലെ കുറുമശേരിയില്‍ പര്യടനം അവസാനിക്കുമ്പോള്‍ സി.പി.എമ്മില്‍ നിന്നു മണ്ഡലം പിടിച്ചെടുക്കാനാവുമെന്നു ധനപാലനു തികഞ്ഞ ആത്മവിശ്വാസം.

ചുവന്ന മണ്ണിലൂടെ വാക്കുകള്‍ ചാട്ടുളിയാക്കി വയലാര്‍ രവി


ടോമി മാത്യു
ആലപ്പുഴ: പുന്നപ്ര-വയലാര്‍ സമരസേനാനികളുടെ രക്തംവീണു ചുവന്ന മണ്ണില്‍ സി.പി.എമ്മിന്റെ നെഞ്ചിലേക്കു ചാട്ടുളിപോലെ തുളഞ്ഞുകയറുന്ന വാക്കുകളുമായാണു കേന്ദ്രമന്ത്രി വയലാര്‍ രവി ഇന്നലെ ആലപ്പുഴ ജില്ലയില്‍ പര്യടനം നടത്തിയത്‌. ആലപ്പുഴയുടെ വടക്കേ അറ്റമായ അരൂക്കുറ്റിയില്‍ നിന്നും രാവിലെ 9നു വയലാര്‍ രവിയുടെ പര്യടനം ആരംഭിക്കുമെന്നാണറിയിച്ചിരുന്നത്‌. 8.55നു തന്നെ എറണാകുളം ഗസ്റ്റ്‌ ഹൗസില്‍ നിന്നു വയലാര്‍ രവി സ്ഥലത്തെത്തിയെങ്കിലും കോണ്‍ഗ്രസ്‌ നേതാക്കള്‍ സ്വീകരണസ്ഥലത്ത്‌ എത്തുന്നതേ ഉണ്ടായിരുന്നുള്ളൂ. ഇതേ തുടര്‍ന്നു പെരുമ്പളം ദ്വീപിലെ വോട്ടര്‍മാരെ കാണാന്‍ മന്ത്രി അങ്ങോട്ടേക്കു പോയി.
അരൂക്കുറ്റിയെ മയക്കത്തില്‍ നിന്നുണര്‍ത്താന്‍ യൂത്ത്‌ കോണ്‍ഗ്രസ്‌ ദേശീയസമിതിയംഗം അനില്‍ ബോസിനെ ചുമതലപ്പെടുത്തി. തലേദിവസം എ കെ ആന്റണി?ക്കൊപ്പം സ്വീകരണവേദികളില്‍ പ്രസംഗിച്ചുതളര്‍ന്ന അനില്‍ ക്ഷീണം വകവയ്‌ക്കാതെ കത്തിക്കയറിയതോടെ ഒഴിഞ്ഞ കസേരകള്‍ നിറഞ്ഞു. പ്രസംഗം ഒന്നരമണിക്കൂര്‍ പിന്നിട്ടപ്പോള്‍ വയലാര്‍ രവിയുടെ വരവറിയിച്ചുകൊണ്ട്‌ അനൗണ്‍സ്‌മെന്റ്‌ വാഹനമെത്തി. പിന്നാലെ കെ.പി.സി.സി സെക്രട്ടറി അബ്ദുല്‍ ഗഫൂര്‍ ഹാജി, ഡി.സി.സി വൈസ്‌ പ്രസിഡന്റ്‌ ടി ജി പത്മനാഭന്‍ നായര്‍ എന്നിവര്‍ക്കൊപ്പം വയലാര്‍ രവിയും. രാജ്യത്തിന്റെ ഭദ്രതയ്‌ക്കു മന്‍മോഹന്‍സിങിന്റെ സര്‍ക്കാരിനെ വീണ്ടും അധികാരത്തിലെത്തിക്കണമെന്ന അഭ്യര്‍ഥനയോടെ രവി പ്രസംഗം ആരംഭിച്ചു.
തുടര്‍ന്ന്‌, എല്‍.ഡി.എഫ്‌ സര്‍ക്കാരിന്റെ ഭരണവൈകല്യങ്ങളിലേക്കു ജനശ്രദ്ധ ക്ഷണിച്ചു. മൂന്നുവര്‍ഷത്തെ വി എസ്‌ സര്‍ക്കാരിന്റെ റിപോര്‍ട്ടില്‍ പറയാനുള്ളതു ക്വട്ടേഷന്‍ സംഘം വര്‍ധിച്ചതിന്റെയും അഴിമതിയുടെയും പോലിസ്‌ സ്റ്റേഷന്‍ ആക്രമണങ്ങളുടെയും കഥ മാത്രമായിരിക്കും. എന്നാല്‍, മന്‍മോഹന്‍സിങിന്റെ സര്‍ക്കാര്‍നേട്ടങ്ങളുടെ പട്ടിക നിരത്തിയാണു ജനങ്ങളോടു വോട്ട്‌ ചോദിക്കുന്നത്‌. പ്രകടനപ്പത്രികയിലെ വാഗ്‌ദാനമായിരുന്ന തൊഴിലുറപ്പു പദ്ധതി നടപ്പാക്കിയെന്നു പറഞ്ഞ വയലാര്‍ രവി കൂട്ടത്തില്‍ സംസ്ഥാന സര്‍ക്കാരിനിട്ടു കൊട്ടുകൊടുക്കാനും മറന്നില്ല. 100 ദിവസത്തിനു പകരം 55 ദിവസം മാത്രം തൊഴില്‍ കൊടുത്തിട്ടു ബാക്കിദിവസത്തെ രൂപ സംസ്ഥാന സര്‍ക്കാര്‍ ലാവ്‌ലിന്‍ കേസിനെപ്പോലെ അടിച്ചുമാറ്റിയെന്നും ആക്ഷേപിച്ചുകൊണ്ടു പ്രസംഗം അവസാനിപ്പിച്ചു.
തുടര്‍ന്ന്‌, അടുത്ത വേദിയായ പൂച്ചാക്കലിലേക്കു തിരിച്ചു. ഇവിടെ നിന്നു തൈക്കാട്ടുശേരി പി.എസ്‌ കവലയിലേക്ക്‌. ഇവിടെ കെ സി വേണുഗോപാലിനെ വിജയിപ്പിക്കണമെന്ന അഭ്യര്‍ഥനയോടെയായിരുന്നു തുടക്കം. പതിനഞ്ചു മിനിറ്റ്‌കൊണ്ടു പ്രസംഗം അവസാനിപ്പിച്ചു വേദിവിട്ടിറങ്ങി. പ്രവര്‍ത്തകരോടു കുശലാന്വേഷണം നടത്തവേ കാലിനു സ്വാധീനമില്ലാത്ത പ്രദേശവാസിയായ പുതുവല്‍ നികര്‍ത്തില്‍ തോമസ്‌ ചികില്‍സാ സഹായം അഭ്യര്‍ഥിച്ചെത്തി. വിവരം ചോദിച്ചറിഞ്ഞ രവി തനിക്കാവുന്ന സഹായം ചെയ്‌തുതരാമെന്നു പറഞ്ഞ്‌, അതിനായി പ്രാദേശികനേതാക്കളെ ചുമതലപ്പെടുത്തിയതിനു ശേഷമാണ്‌ അടുത്ത സ്വീകരണവേദിയിലേക്കു യാത്രയായത്‌. പള്ളിച്ചന്ത, മുഹമ്മ എന്നിവിടങ്ങളിലെ പ്രസംഗത്തിനു ശേഷം മണ്ണഞ്ചേരിയിലെ വേദിയില്‍ വയലാര്‍ രവിയെത്തുമ്പോള്‍ സമയം 1.15. മാലപ്പടക്കത്തിന്റെ അകമ്പടിയോടെ സ്വീകരണം. പ്രദേശത്തിന്റെ മര്‍മമറിഞ്ഞു വാക്കുകള്‍ അളന്നുതൂക്കിയ പ്രസംഗം.
അര്‍ക്കാഡിയിലെ ഉച്ചഭക്ഷണത്തിനും വിശ്രമത്തിനും ശേഷം അബ്ദുല്ലക്കുട്ടിക്കൊപ്പം നാലുമണിയോടെ അടുത്ത പ്രസംഗവേദിയായ പുലയന്‍വഴി ജങ്‌ഷനിലെത്തി. തുടര്‍ന്ന്‌, അബ്ദുല്ലക്കുട്ടിയുടെ പ്രസംഗം. മന്‍മോഹന്‍സിങ്‌ സര്‍ക്കാര്‍ വീണ്ടും അധികാരത്തിലെത്തേണ്ട ആവശ്യകതയും മതന്യൂനപക്ഷങ്ങളിന്മേലുള്ള പീഡനങ്ങളും നിരത്തിയ വയലാര്‍ രവി ഒരുമണിക്കൂറിനു ശേഷം പ്രസംഗം അവസാനിപ്പിച്ചു. തുടര്‍ന്ന്‌ ഇന്നലത്തെ അവസാനത്തെ പ്രസംഗവേദിയിലേക്കു തിരിക്കുമ്പോള്‍ പടിഞ്ഞാറു കടലിലേക്കു സൂര്യന്‍ താഴ്‌ന്നുതുടങ്ങിയിരുന്നു.

തുളുനാട്ടില്‍ ആത്മവിശ്വാസം നിറച്ച്‌ യെച്ചൂരിയുടെ പര്യടനം


നാരായണന്‍ കരിച്ചേരി

കാസര്‍കോഡ്‌: പത്തോളം ഭാഷകളും വിവിധ സംസ്‌കാരങ്ങളും സംഗമിക്കുന്ന തുളുനാട്ടിലേക്കു കഴിഞ്ഞദിവസം സി.പി.എം പോളിറ്റ്‌ ബ്യൂറോ അംഗം സീതാറാം യെച്ചൂരിയെത്തിയതു മംഗലാപുരത്തു നിന്ന്‌. കേരളം കര്‍ണാടകയുമായി അതിര്‍ത്തി പങ്കിടുന്ന മഞ്ചേശ്വരത്തെത്തിയപ്പോള്‍ സി.പി.എം നേതാവ്‌ എം രാജഗോപാലന്‍ പറഞ്ഞു: ഇനി കേരളം. മഞ്ചേശ്വരം മണ്ഡലം സി.പി.എം പിടിച്ചെടുത്ത സംഭവം അദ്ദേഹം യെച്ചൂരിയോട്‌ അഭിമാനത്തോടെ പറഞ്ഞു.
കുമ്പള പിന്നിട്ടപ്പോള്‍ കാസര്‍കോട്ടെ എല്‍.ഡി.എഫ്‌ സ്ഥാനാര്‍ഥി പി കരുണാകരന്‍ എം.പിയുടെ ഫോണ്‍വിളി. തിരഞ്ഞെടുപ്പുപര്യടനത്തിന്റെ തിരക്കിലായതിനാല്‍ കാസര്‍കോട്ടെ പരിപാടിയില്‍ സംബന്ധിക്കാനാവില്ലെന്ന്‌ അറിയിക്കാനായിരുന്നു അത്‌.
ഇവിടെ ടൗണിനു വെളിയിലായി തയ്യാറാക്കിയ പന്തലിനകത്തു ചൂട്‌ സഹിക്കാനാവാതെ ജനക്കൂട്ടം. വിയര്‍ത്തൊലിച്ച അവര്‍ യെച്ചൂരിയുടെ വരവും കാത്തുനില്‍ക്കുകയായിരുന്നു. വേദിയില്‍ ഐ.എന്‍.എല്‍ നേതാവ്‌ പി എം എ സലാം എം.എല്‍.എ പ്രസംഗിച്ചുകൊണ്ടിരിക്കുന്നു. അതിനിടെ വെള്ള അംബാസിഡര്‍ കാറില്‍ നിന്നു സൗമ്യമായ പൂഞ്ചിരിയോടെ പുറത്തിറങ്ങിയ യെച്ചൂരി, സി.പി.എം നേതാവ്‌ എം രാജഗോപാലനോടൊപ്പം പ്രവര്‍ത്തകരുടെ മുദ്രാവാക്യം വിളികള്‍ക്കിടെ വേദിയിലേക്ക്‌. ജില്ലാ സെക്രട്ടറി കെ പി സതീശ്‌ചന്ദ്രന്‍ പൂമാലയിട്ടു സ്വീകരിച്ചു.
കോണ്‍ഗ്രസ്‌ എസ്‌ പ്രസിഡന്റ്‌ കടന്നപ്പള്ളി രാമചന്ദ്രന്റെ ഹ്രസ്വഭാഷണത്തിനു ശേഷം യെച്ചൂരി പ്രസംഗം തുടങ്ങി: ?`എന്റെ കാസര്‍കോട്ടെ സഹോദരീ സഹോദരന്മാരെ, എല്ലാവര്‍ക്കും അഭിവാദ്യം. എനിക്കു മലയാളത്തില്‍ പ്രസംഗിക്കാനറിയില്ല. എന്റെ മാതൃഭാഷ തെലുങ്കാണ്‌. അതിനാല്‍ ഇനി ഞാന്‍ ഇംഗ്ലീഷില്‍ പ്രസംഗിക്കാം' എന്നു മലയാളത്തില്‍ പറഞ്ഞുതുടങ്ങിയപ്പോള്‍ സദസ്സിന്റെ കൂട്ട കൈയടി. മൂന്നാംമുന്നണിയുടെ ആവശ്യകത, ബി.ജെ.പിയെയും കോണ്‍ഗ്രസ്സിനെയും അധികാരത്തില്‍ നിന്ന്‌ അകറ്റിനിര്‍ത്തേണ്ടതിന്റെ കാരണം തുടങ്ങിയ വിഷയങ്ങളെ കേന്ദ്രീകരിച്ചായിരുന്നു അദ്ദേഹം സംസാരിച്ചത്‌. ബി.ജെ.പിക്കും കോണ്‍ഗ്രസ്സിനും ഇനി തനിച്ചു ഭരിക്കാനാവില്ലെന്നും തിരഞ്ഞെടുപ്പിനുശേഷം ഇടതു പക്ഷം നേതൃത്വം നല്‍കുന്ന മൂന്നാംമുന്നണിയായിരിക്കും ഡല്‍ഹിയില്‍ അധികാരത്തിലെത്തുകയെന്നും തികഞ്ഞ ആത്മവിശ്വാസത്തോടെ യെച്ചൂരി പറഞ്ഞപ്പോള്‍ സദസ്സില്‍ ആവേശം. ലോകത്ത്‌ ആദ്യമായി കമ്മ്യൂണിസ്റ്റ്‌ മന്ത്രിസഭ അധികാരത്തിലെത്തിയ കേരളം ഇത്തവണ മുഴുവന്‍ ഇടതുമുന്നണി സ്ഥാനാര്‍ഥികളെയും വിജയിപ്പിക്കുമെന്നാണു തന്റെ പ്രതീക്ഷയെന്നു പറഞ്ഞായിരുന്നു സി.പി.എം നേതാവ്‌ തന്റെ പ്രസംഗം അവസാനിപ്പിച്ചത്‌. തുടര്‍ന്ന്‌, പയ്യന്നൂരിലെ തിരഞ്ഞെടുപ്പു പൊതുയോഗത്തിലേക്കു നേതാക്കള്‍ക്കൊപ്പം യാത്ര.

ജനാധിപത്യം ലക്ഷ്യം വീണ്ടെടുക്കണം


എ പി സലാം

എന്തൊക്കെ പറഞ്ഞാലും ഇന്ത്യയിലെ യുവജനങ്ങളെ വളരെയധികം സ്വാധീനിക്കുന്ന ഘടകമായി രാഷ്ട്രീയം ഇന്നു മാറിക്കഴിഞ്ഞിട്ടുണ്ട്‌. നെക്‌സ്റ്റ്‌ ജനറേഷന്‍ എന്നു വിളിക്കപ്പെടുന്ന വളരെയധികം ക്രിയാത്മകശേഷിയുള്ള ഒരു തലമുറ ഇന്ത്യയിലുണ്ട്‌. ഇവരെ കണ്ടില്ലെന്നു നടിക്കാന്‍ പറ്റില്ല- പാരാഗ്ലൈഡിങ്‌ താരം സുനില്‍ ഹസന്‍ പറയുന്നു.
ഇവരുടെ പ്രധാനലക്ഷ്യം ഭേദപ്പെട്ടൊരു തൊഴിലാണെങ്കിലും ഇന്ത്യയിലെ രാഷ്ട്രീയാവസ്ഥയും രാഷ്ട്രത്തിന്റെ ഭാവിയും അവരെ ചിന്തിപ്പിക്കുകയും അസ്വസ്ഥപ്പെടുത്തുകയും ചെയ്യുന്നുണ്ട്‌. ആഗോള സാമ്പത്തികപ്രതിസന്ധി അനുദിനം രൂക്ഷമായി?ക്കൊണ്ടിരിക്കുമ്പോള്‍ നടക്കുന്ന ലോക്‌സഭാ തിരഞ്ഞെടുപ്പ്‌ ഏതുവിധത്തിലുള്ള സര്‍ക്കാരിനെയാണ്‌ അധികാരത്തിലെത്തിക്കുകയെന്നു വളരെ ആകാംക്ഷപൂര്‍വം കാത്തിരിക്കുന്നവരാണിവര്‍. കക്ഷിരാഷ്ട്രീയവും അതിനുള്ളിലെ പ്രശ്‌നങ്ങളും അധികാര വടംവലിയും കുതിരക്കച്ചടവും കഴിഞ്ഞു രാജ്യത്തെക്കുറിച്ചു ചിന്തിക്കാനുള്ള സമയം ഭരണകര്‍ത്താക്കള്‍ക്ക്‌ ഇല്ലാത്ത സ്ഥിതിയാണിന്ന്‌. ഇതാണ്‌ ഇന്ത്യ നേരിടുന്ന പ്രധാന വെല്ലുവിളിയും. ഈ അവസ്ഥ മാറി ജനാധിപത്യത്തിന്‌ അതിന്റെ യഥാര്‍ഥ ലക്ഷ്യം വീണ്ടെടുക്കാനാവണം. ജനങ്ങള്‍ സ്വയം ബോധവാന്മാരായി രംഗത്തെത്തുന്നതുവരെ ഈ ചവിട്ടുനാടകം തുടരും. ഭരണതലത്തില്‍ എന്താണ്‌ സംഭവിക്കുന്നതെന്നറിയാന്‍ പൊതുജനങ്ങള്‍ക്ക്‌ അവകാശമുണ്ടെന്നും സുനില്‍ അഭിപ്രായപ്പെട്ടു.